20:02 06 апреля 2020 г.
Шкул ачисем паян каникул хыççăн пĕрремĕш кун вĕренчĕç. Анчах яланхилле партăсем хушшине мар, компьютер умне ларса çĕнĕ вĕренӳ чĕрĕкне пуçларĕç.
Zoom платформа çинче çĕнĕлле ĕçлеме иртнĕ эрнерех вĕренме пуçланă учительсем паян пĕрремĕш хут онлайн уроксем ирттерчĕç.
Çакăн йышши хăнăхăва алла илме тӳрех çăмăлах мартан Чăваш Республикин вĕренӳ институчĕн этнокультура вĕренĕвĕн кафедри кашни кунах онлайн занятисем ирттерет. Чи малтанхи занятисенче учительсем платформăра çĕнĕ уроксем планлама, ачасене урока йыхравлама вĕренчĕç, халĕ вара вĕсем презентацисем кăтартма та, экранпа тухăçлă ĕçлеме те, ачасене хавхалантарма та пултараççĕ.
Федерацин патшалăх вĕренӳ стандарчĕпе килĕшӳллĕн ачасен хутшăну компетенцине те аталантармалла. Zoom платформăра вара ушкăнпа та ĕçлеме пулать. Ушкăнсене пайласа ĕçлеттерес хăнăхăва вĕренекенсем ыран малалла аталантарĕç.
БУ ЧР ДПО "Чувашский республиканский институт образования" Минобразования Чувашии