17:26 05 июня 2019 г.
Çĕртме уйăхĕн 4-мĕшĕнче «Çăлтăрсен ушкăнĕ/ Созвездие» лагерьте 2019 çулхи пĕрремĕш смена уçăлнине халалланă хаваслă линейка иртрĕ. Лагерьте пурăнакан ачасене нумай функциллĕ «Çăлтăрсен ушкăнĕ» центрĕн тĕп директорĕ Александр Портнов, Чăваш Республикин вĕренӳ институчĕн ĕҫченĕ Инесса Ядранская, «Чăваш Ен» фондăн президенчĕ Михаил Федотов саламларĕç.
Инесса Ядранская «Çăлтăрсен ушкăнĕ» лагерьте кăçалхи ҫул иккĕмĕш хут «Эпĕ нумай чĕлхе пĕлетĕп» профиль смени ĕҫленине палăртрĕ. Ун программипе килĕшӳллĕн ачасем нумай нациллĕ Раççейĕн культурипе, халăхсен йăли-йĕркипе тата авалтан юлнă традицийĕпе паллашĕҫ. Профильте ачасене асра юлмалли уявсем, кăсăк ĕç-пуç, час-час аса илмелли пулăмсем, манăçми хаваслă самантсемпе тулли кунсем, туссемпе, интереслĕ çынсемпе ирттерекен хутшăнусем, асран тухми сехетсемпе минутсем кĕтеççĕ.
Михаил Федотов «Чăваш Ен» фонд малалла та «Тĕл пулма тунă утăм/Шаг навстречу» проектпа ĕçленине пĕлтерчĕ. Аслăрах ачасем кĕçĕннисене шефа илĕç, вĕсене пулăшса пырĕҫ.
Хаваслă линейка хыççăн отрядсем лагерь ачисемпе вожатăйĕсем хатĕрленĕ концертра пулчĕç.
БУ ЧР ДПО "Чувашский республиканский институт образования" Минобразования Чувашии