10:26 19 февраля 2018 г.
Республикӑн пӗрлехи экзаменӗн тӗп тӗллевӗ – 9 класс пӗтерекен ачан чӑваш чӗлхипе пухнӑ пӗлӗвне пӗтӗмӗшле аттестаци картӗнче хакласси. Экзаменра ачасен тӗрлӗ хӑнӑхӑвне тӗрӗслеҫҫӗ, ҫавӑнпа вӗрентекенсен ачасене изложенипе сочинени ҫырма та, чӗлхе пӗлӗвӗн ыйтӑвӗсене хуравлама та вӗрентес пулать.
Çак тӗллевсене пурнӑҫлама пулӑшма 2018 ҫулхи нарӑсӑн 15-17-мӗшӗсенче Чӑваш Республикин вӗренӳ институчӗн чӑваш чӗлхипе литератури кафедри «Чӑваш чӗлхипе республикӑн пӗрлехи экзаменне тытма хатӗрлесси» программӑпа вӗрентекенсен ӑсталӑхне ӳстерекен курс ирттерчӗ.
Чӑваш чӗлхипе литературине вӗрентекенсем республикӑн пӗрлехи экзамен тытӑмӗпе тата тӗллевӗпе, текст тишкермелли методикӑпа паллашрӗҫ, тест ыйтӑвӗсене хуравлама вӗрентес ӗҫе йӗркелемелли тухӑҫлӑ фомӑсене алла илчӗҫ, изложенипе сочинени ҫырма вӗрентмелли хӑнӑхӑва аталантарса ҫирӗплетрӗҫ, шкул ачисен экзаменра тӗл пулакан паллӑрах йӑнӑшӗсене тишкерчӗҫ.
Курса республикӑри чи пултаруллӑ учительсем пуҫтарӑннине палӑртса хӑвармалла, ҫавӑнпах пулӗ вӗсем ушкӑнпа та активлӑ ӗҫлерӗҫ, тӗрлӗрен тренингра та хастар пулчӗҫ.
Пӗлӳлӗхпе ӑсталӑха ӳстермелли курс пуриншӗн те усӑллӑ иртрӗ.
БУ ЧР ДПО "Чувашский республиканский институт образования" Минобразования Чувашии