16:20 09 октября 2015 г.
2015 çулхи юпа уйăхĕн 9-мĕшĕнче Чăваш Республикин вĕренÿ институтĕнче «Çамрăк педагогсен шкулĕ – 2015» проекта хутшăнакан вĕрентекенсем валли ăста урокĕсем иртрĕç. Чăваш чĕлхипе литератури, вырăс чĕлхипе литератури тата ют чĕлхе учителĕсем умĕнче пĕрремĕш урока 2012 çулта Пĕтĕм Раççейри тăван чĕлхе учителĕсен конкурсĕнче мала тухнă, Муркаш районĕн Калайкасси вăтам шкулĕнче чăваш чĕлхипе литератури вĕрентекен Александр Марсович Степанов вĕренÿ лаççи технологиĕпе кăтартрĕ. Иккĕмĕш урокра Шупашкар хулин 19-мĕш шкулĕнче чăваш чĕлхипе литератури вĕрентекен Роза Анатольевна Мазикова проблемăллă вĕренÿ технологийĕн вăрттăнлăхĕсемпе паллаштарчĕ, çав шкултах вырăс чĕлхипе литератури вĕрентекен Наталья Юрьевна Тимофеева вара проект технологийĕпе ĕçлеме вĕрентрĕ.
Çамрăк педагогсене занятисем килĕщрĕç, шкула кайсан асăннă технологисемпе хăйсем те усă курасса шантарчĕç.
Ăста урокĕсем ирттернĕ вĕрентекенсене чĕререн тав тăватпăр, малалла та хастар ĕçлеме ăнăçу сунатпăр.
БУ ЧР ДПО "Чувашский республиканский институт образования" Минобразования Чувашии